You are in: Home › Registration › A' Clàradh Bàis ›

A’ Clàradh Bàis

Cò is urrainn bàs a chlàradh ann an Alba?

Is urrainn na leanas bàs a chlàradh:

• Neach sam bith a tha càirdeach don neach nach maireann, no
• Neach sam bith a bha an làthair nuair a bhàsaich an neach, no
• Tuitear no riochdaire laghail eile an neach nach maireann, no
• Neach-còmhnaidh an àite sna bhàsaich an neach, no mur eil leithid de dhuine ann,
• Duine sam bith eile aig a bheil an fhiosrachadh a dh’fheumar a chlàradh.

Ciamar agus càit am bi mi a’ clàradh bàis?

Feumaidh bàs sam bith a thachras ann an Alba a bhith air a chlàradh taobh a-staigh ochd latha le Neach-clàraidh Breith, Bàs is Pòsaidhean.  Tha an lagh ag iarraidh air a’ bhàs a bhith air a chlàradh an dàrna cuid anns an sgìre clàraidh far na thachair am bàs no anns an sgìre clàraidh far an robh an neach nach maireann a’ fuireach (sgìre “còmhnaidh àbhaisteach”, a tha san t-suidheachadh seo a’ ciallachadh dachaigh àbhaisteach ann an Alba an neach nach maireann, ’s chan e seòladh a bha aig neach a bha air làithean-saora aig àm a’ bhàis).  Faodar seòladh an neach-clàraidh ionadail fhaighinn bhon neach-adhlacaidh, bhon ospadal, an dotair, leabhar nam fòn (faic fo ‘Clàradh Breith, Bàs agus Pòsaidhean’) no Liosta Luchd-clàraidh na h-Alba (Directory of Registrars in Scotland) (faidhle pdf 170 Kb).  Bidh sibh airson fios a bhith agaibh gun urrainn adhlacaidh gabhail àite ron chlàradh ach chan urrainn luaithreachadh a dhèanamh gus an tèid am bàs a chlàradh.

Dè na sgrìobhainnean a bu chòir a thoirt leam chun neach-clàraidh?

Bu chòir na leanas a thoirt leibh:

• Teisteanas meadaigeach le adhbhar a’ bhàis;
• Teisteanasan breith agus pòsaidh an neach nach maireann;
• Cairt mheadaigeach NHS an neach nach maireann;
• Sgrìobhainnean sam bith co-cheangailte ri bhith a’ faighinn peinnsean no cuibhreann bho mhaoin an riaghaltais.

Na gabhaibh dragh mur eil na sgrìobhainnean seo agaibh oir is urrainn don neach-clàraidh fhathast a dhol air adhart leis a’ bhàs a chlàradh.

Nuair a tha an clàradh dèante bheir an neach-clàraidh dhuibh, saor ’s an asgaidh:

• Teisteanas de chlàradh a’ bhàis airson a thoirt don neach a tha an urra ris an àite-tìodhlacadh no an luaithreachan;
• Teisteanas clàradh Tèarainteachd Shòisealta no fios mun bhàs airson a chleachdadh gus sochairean Tèarainteachd Shòisealta fhaighinn no atharrachadh.
• Is urrainnear earrann de fhiosrachadh a’ bhàis sa chlàr fhaighinn le pàigheadh air a shon.

Dè ma thachras am bàs thall thairis?

Bu chòir am bàs a chlàradh a rèir riaghailtean ionadail na dùthcha anns a bheilear agus teisteanas-bàis fhaighinn.  Is math dh’fhaoidte gun urrainnear am bàs a chlàradh le Consal Bhreatainn anns an dùthaich sin le pàigheadh.  Ach, chan eil dleastanas sam bith oirbh seo a dhèanamh.  Thèid fiosrachadh mun bhàs a chur a dh’Alba agus bhon a sin thèid agaibh air lethbhreac fhaighinn bho Taigh Ùr a’ Chlàraidh (New Register House).

English

Air ais chun toiseach